Awe mainta a tuma luga despedida di e ex-politico Rudy Croes, cu a fayece diasabra ultimo. E tabata co-fundado di partido MEP, a ocupa e puesto di minister na dos ocacion, presidente di parlamento y parlamentario durante basta aña largo. Desde aña 2009 el a baha como minister, e no a aparece riba lista politico mas y a bay dedica na comercio, manehando CITGO Savaneta, cu el a tuma over di su ruman Aiky Croes.
Despues di basta aña di lucha feroz contra cancer, diasabra el a dicidi di bay sosega. E proceso di su enfermedad tabata pisa y Rudy a biaha na varios ocacion pa busca un di dos opinion y hasta pa por logra haya cuido alternativa. Pero aunke el a logra alarga su y mehora su calidad di bida cu tempo, toch e enfermedad na final a gana e guera.
Hyacintho Rudolfo (Rudy) Croes a nace na Aruba, dia 5 di september 1946. E ta yiu di Maria Louisa Lopez y Francisco Cornelio Croes. Nan ta un famia di no menos cu 12 ruman. Rudy ta casa cu Damia Arends y ta tata di Dione, Reu, Ofo, Betto y ta welo di un nieta. El a drenta politica desde 1971 ora a funda MEP, pero a subi lista na 1989 y a haya mas voto e tempo ey cu e lider mes.
Cu Rudy Croes sosega na paz.
