Diabierna mainta na Mariniers Kazerne, Savaneta, tabata tin e ceremonia pa honra 10 hoben cu a finalisa nan periodo di Formacion Social, grupo SVT13, a ricibi nan beret [certificado] despues di un esfuerso di cuater luna, nan mester a pone tur loke nan a siña den practica siman pasa pa finalmente ricibi nan beret diabierna. Nan ta bay over awo na stage pa cuater luna pa despues ricibi nan diploma den 2021.
Art van Beekhuizen, comandante na Mariniers Kazerne ta splica cu e programa aki ta realmente hopi importante pa e hobennan aki, na unda nan ta siña respet, disciplina, responsabilidad y con pa traha hunto. Esaki ta cosnan cu bo mester por sa pa sigui un opleiding despues di esaki, bay stage of pa busca y mantene un trabao. E meta ta pa sigui cu e hobennan cu a cay afo di e grupo aki pa 2021, nan a cay afo pa motibo di Covid19 algun di nan a resulta di ta positivo y mester a wordo elimina for di e programa. Ta spera cu otro aña tambe lo por cuminsa un programa similar pero pa hobennan femenino tambe.
Pa e hobennan esaki ta representa un chens nobo, pa un bida y un futuro nobo, y pa gobierno di Aruba esaki ta representa e mesun chens ey segun minister di asuntonan social, Glembert Croes, kende tambe tabata presente durante e ceremonia. “Mi ta reconoce cu no ta nos a tuma iniciativa di formacion social, e ta un projecto cu a cuminsa durante gobierno anterior na 2011. Mi ta agradecido na gobierno di Aruba pa permiti mi ta encarga cu formacion social y pa e hobennan aki cu ta lucha den bida pa nan para riba nan pia y haya chens nobo den bida ta parti di mi tareanan como minister,” segun minister Croes. E ta remarca cu esaki ta un diamante di programa pasobra cu e cooperacion cu marina Hulandes,nan ta duna e hobennan – den spirito di loke ta formacion militar – training riba conducta, etica, disciplina, training semi-militar pa nan haya structura y forma den nan bida.
Na momento cu nan termina e programa aki, e siguiente paso ta bay na con ta yuda forma un hoben nobo cu caracter nobo, duna nan chens pa haya trabao of sigui studia. Den e grupo actual aki, hopi di nan kier sigui, nan ta gradua den formacion social pero nan kier bira militar.
Na tur esnan cu a gradua tambe caba tambe kier wak con ta tene nan hunto pa nan keda comparti nan experiencia di bida riba con a sigui cu nan despues cu nan a gradua for di formacion social. “Mi lo desea pa diferente hende y organisacion bini hunto pa wak con ta yuda e hobennan aki subi mercado laboral na Aruba ora nan caba. Si nan mester di un training extra, sea na enseñansa pa empleo of defini cierto curso pa prepara nan pa haya un trabao,” segun minister Croes.