Aymar Middendorp Cantante y Musico a forma parti di e produccion di Karixon na Hulanda “ Generacion pa Generacion” caminda varios musico/ talento hoben a uni pa duna e cancion inmortal di Padu, Abo So, un toke moderno. Esaki principalmente tabata dirigi na e generacion nobo cu tambe ta mira Padu del Caribe como nan inspiracion di mas grandi den musica.
Na momento cu Karixon a tuma contacto cun’e, e contesta tabata mes ora cu si, ta locual cu Aymar a conta. Padu Lampe a hunga un rol grandi den su bida. Mario Midderdorp kende ta tata di Aymar tabata integrante/ musico den banda cu Padu pa hopi aña, cariñosamente yama como Shon Padu.
Compartiendo hopi anecdota inolvidabel como mucha hunto cu e banda y cu Padu, a haci un bunita influencia den su bida y como musico. Impresiona semper cu e pensamento cu Padu su estilo ta unico ta locual a empuhe pa semper purba di ta unico den su propio estilo. Ta algo cu e kier impone den su propio musica.
Aymar ta conta cu pa forma parti di e produccion di Karixon tabata un honor y awe e ta mas contento cu nunca di a haci esaki. Hopi duele den su curason di no por a bay su Isla pa bishita pero mas aun di por a despidi di Padu.
Nostalgia
Tur Arubiano den experior cu scucha e cancion “ Abo So “ ta sinti y carga su isla y ta recorda e cancion como nan segundo himno, unda cu nan por toke na mundo. Mas ora bo ta leu di bo cas. Cultura ta resona. Aymar ta conta cu e mes tin su propio version di e cancion cu e ta interpreta cu masha orguyo.
Mensahe
Scucha su letranan. Scucha su cancionnan. Aprecia nos Cultura, apreci’e awo pa nunca e bay atras.
Genard “Karixon” Mohamed, DJ/Producer, talento encarga cu e bunita produccion “Generacion pa Generacion” dedica na Juan Chabaya “Padu” Lampe. Un bishita inespera durante su vacacion den 2018 cu a bira un storia inolvidabel. Comiendo, tocando y experenciando un dia completo cu nos Tata di Cultura Padu Lampe a bira un produccion di cual e ta sumamente agradecido y orguyoso.
Un encuentro y iniciativa di un bon amigo cu den apenas dos dia a capta y influencia e comienso di un produccion na honor di nos Tata di Cultura. Na Dany Cruz ta bay palabra di danki pa duna inicio na un bunita homenahe.
Despues di a laga ideanan forma, a bin concretisa riba esun cu mas el a gusta cu ta esun cu a bira e idea final bou nomber “ Generacion pa Generacion” caminda studiante / musiconan Arubiano biba na Hulanda a uni pa duna e cancion “Abo so” un bachi nobo interpreta pa e generacion nobo. Den e produccion aki a tuma contacto cu 10 studiante y a cuminsa graba y presenta e produccion final cu a haya un acogida hopi grandi tur caminda.
Maske e influencia folklorico no tabata algo cu el a lanta cun’e, Karixon ta conta cu algun cancion sigur ta resalta y toca entre e generacion nobo. Biniendo di un otro mundo di musica e tabata un reto pa produci y traha e proyecto aki pa duna un aporte na cancion cultural. Padu tabata pintor, tabata skirbi buki y tur esaki lo ta algo cu Karixon a uza pa duna realse na e produccion pa laga nos generacion nobo aprecia pasado musical / cultura di unda nan ta bin.
Nos cultura ta algo cu na tur momento nos ta keda anhela y ta algo cu ta bin dilanti na cualkier evento cu e presenta. Arubianonan kier scucha nos hendenan, nos cancionnan nos cultura. Karixon ta bisa cu ora nos ta afo nos kier ta mas cerca di nos cultura cu ora nos ta na Aruba mes. Padu su musica lo keda carga pa semper, nos lo aprecia musica internacional pero nos lo aprecia nos musiconan local.
Mensahe
Padu su trayectorio lo keda nos influencia, ban laga su memoria bibo den nos curason y den nos presentacion.
Xavier
Xavier Geerman, guitarista biba na Hulanda tambe ta conta su experiencia como musico y e influencia cu Padu tin riba locual cu e ta presenta awe tur caminda. Padu ta e persona cu for di inicio a influencia e musica cultura / tradiciona cu nos tin awe manera entre otro e waltz, danza y hopi mas.
Nos cultura lo biba cu recuerdonan di fiesta y encuentronan musical cu a hunga un influencia riba e musica cu nos tin awe. Xavier ta menciona tambe e echo cu Padu Lampe como pionero a sa di lanta su propio studio di grabacion “ Padu Records “ cu a duna bida y inmortalisa hopi di e piesanan cu pa semper lo keda presenta pero tambe uza como referencia/ destinacion na e musica di antes di con e lo mester keda toca pa e futuro generacion
Agradecido sigur di cu e musiconan hoben lo keda cu e oportunidad di rebiba nos cultura pa semper cu cada produccion laga atras pa nan.
Xavier ta conta cu como parti di nos Cultura e ta un gran inspiracion personal den su musica, el a forma ken e ta y esaki ta resalta den su presentacionnan cargando su originalidad pero tambe cada Arubiano artista na unda cu nan por ta.
Den un intercambio cultural cu Xavier a forma parti di dje na Grecia e la haya e oportunidad di toca e cancion “Abo so” di Padu caminda cu un biaha mas e cancion aki a capta atencion. Pa Xavier e tabata un honor di por a duna un splicacion di ken ta Padu, e ritmo uza y con bunita nos Cultura ta. Asina aki nos lo keda recorde, represente y balore unda cu nos bay.
“Awe mi ta contento di por comparti cu boso cu awe merdia mi a ricibi mi Bachelor’s diploma den “Classical music composition”. Cu sentimentonan mixto mi ta celebra mi victoria mientras cu mi ta lamenta e fayecimento di nos tata di cultura. Mi a siña hopi di su composicionnan y a tuma inspiracion for di nan. Sin nan mi lo no por ta para akinan awo. Masha danki Padu pa bo contribucion na nos cultura y musica folklor.”
