أخر الاخبار

فيسبوك اعلن على تويتر عن خلل في تطبيقاته

 لو خدت بالك الساعات اللي فاتت دي إن فيسبوك وماسنجر وإنستجرام وواتسات اتقفلوا، خليني أقول لك إن اللي حصل كبير جدًا ومش طبيعي، والمرجح إنه كان تهكير، ولأول مرة العالم كله بيحصل له شلل فعلي لمدة ساعات، بعد اعتماد الناس الكلي على وسائل التواصل الاجتماعي. الحكاية لها جوانب كتير، بس أساسها إن الفيسبوك بدأ يطلب وياخد معلومات وتفاصيل دقيقة عن أي حد بيعمل أكونت، وكل ما بتكتب معلومات أكتر عن نفسك كل ما الأكونت يبقى حيوي أكتر، ومن هنا بدأ يحصل حاجات غريبة جدًا، زي إنك مثلًا تكون بتتكلم مع صديق ليك على واتساب عن لون البطانية بتاعتك تلاقي الفيسبوك جاب لك إعلانات بطاطين، إنك عاوز تشتري ساعة تلاقي إعلانات ساعات كتير، ودا معناه واضح وصريح وهو تجسس على الخصوصيات الكاملة بتاعتك اللي بتتعامل بيها من خلال وسائل التواصل دي، واللي بيراقبك الشركة نفسها، وعارفة عنك كل حاجة تقريبًا، يعني من الآخر إنتَ عريان قدامهم بكل اللي فيك من مساوئ أو حسنات، لأنهم لو جمعوا بعض المعلومات من كل شات هتدخله في اليوم هما بكدا عرفوا لون ملابسك الداخلية، ودا كله طبعًا لتحقيق ربح أكتر. الغريب بقى إن العطل اللي حصل في فيسبوك جيه بعد اتهام (فرانسيس هوجن) الرئيسة السابقة في فيسبوك اللي خرجت وقالت إنهم بيهتموا بالربح على حساب السلامة، وحرفيًا فضحتهم والدنيا قامت عليهم. إنتَ متخيل إن فيسبوك نفسه علشان يعلن عن المشكلة نزل تويتة على تويتر، علشان توصل للناس وقال فيها: "نحن ندرك أن بعض الأشخاص يواجهون مشكلة في الوصول إلى التطبيقات، نحن نعمل على إعادة الأمور إلى طبيعتها في أسرع وقت ممكن، ونعتدز عن أي إزعاج". يُقال إن اللي حصل الساعات اللي فاتت إن حد اخترق الفيسبوك، وبدأ يتلاعب في السيرفرات، فنزل قرار بوقفه هو والأبليكيشنز التانية لحد ما يحلوا المشكلة، ودا لأنهم زي ما إنتم عارفين بقوا مملوكين لشخص واحد وهو (مارك)، فبالتالي أي مشكلة هتحصل في برنامج معين هتطول البرامج التاني. الإدارة كانت بتحاول بكل جهدها إنها تحل المشكلة لدرجة إنهم أعلنوا إنهم أرسلوا فريق متخصص لكاليفورنيا علشان يحل العطل يدوي، ولكن الموضوع مكنش سهل، ويُقال إن اللي عمل المشكلة دي موظف في فيسبوك نفسه! ولكن خرج اتنين من أعضاء فريق الأمان في فيسبوك، وقالوا تصريح بشرط ميتمش الكشف عن هويتهم لأنهم غير مصرح لهم يتكلموا في العلن، إن اللي حصل مش اختراق وصعب يحصل اختراق للـ4 أبليكيشن في وقت واحد. ولكن الكلام دا عايم ومحتاج تدقيق أكبر، لأن وقف الأبليكيشنز مكنش بسبب الإختراق، بل وارد يكون تم الإختراق وبعدها نزل قرار من (مارك) بوقف الأبليكيشنز، فاللأسف برضه ماحدش فاهم حاجة. بعض الجرايد نزلت وقالت إن فيه هجوم كبير على (مارك) لإنه بيستغل خصوصيات الناس علشان يحقق ربح من خلال الإعلانات اللي المستخدمين بيدفعوا فلوس مقابل ترويجها، وكل ما تجيب ناتج أكبر كل ما هيدفعوا أكتر، وهو بيكسب، ودا برضه مع اتهام رئيسة فيسبوك السابقة (فرانسيس هوجن). تخيل إن في الكام ساعة بس اللي فاتوا (مارك) خسر 7 مليار دولار حسب مقالات اتنشرت في بعض الجرايد الأجنبية، دا غير إن أسهم الشركات بتاعته نزلت 5.5%، ولو الموضوع كان استمر شوية كمان كانت الأسهم هتنهار وممكن في لحظة يعلن إفلاسه، واحد من أغنى أغنياء العالم كان ممكن في لحظات ينتهي. رغم كل دا تويتر كان شغال طبيعي، لدرجة إن نيتفليكس نزلت تويتة بتسخر من باقي الأبلكيشنز على طريقة مسلسل "Squid Game" وكتبت "When instegram, facebook are down" وشكرت في تويتر، فعلقت إدارة تويتر بصورة تانية فيها سخرية أكبر، هسيب لكم الصورة في الكومنتات! المهم في الموضوع أو الكارثة إن الناس كلها دلوقتي حرفيًا اكتشفت أهمية البرامج دي، بل إن فيه ناس حياتها وقفت، وناس شغلها وقف في لحظة. لدرجة إن البيت الأبيض علق على الموضوع وقال "إن منصات التواصل أثبتت أن لديها قوة لا تستطيع السيطرة عليها". فيسبوك وماسنجر وإنستجرام وواتساب حرفيًا مسيطرين على حياتنا، لا حد عارف يرد على رسالة أو يبعت رسالة، ولا عارف يشوف خبر جديد موجود على فيسيبوك، احنا مش بس بنستخدمها كبرامج للتواصل ما بينا، دي برامج ممكن يقوم عليها شغل دعاية وتسويق كامل لشركات تفلس لو البرامج دي وقفت، غير إنهم بقوا دليلك في كل حاجة، خبر جديد بتعرفه من خلالهم، بتشوف العالم بيحصل فيه إيه! ودا يخلينا نسأل سؤال مهم، هل همَ نجحوا في السيطرة الحرفية علينا كبشر، وهنا أنا فعلًا بتكلم عن العالم كله، لأن اللي حصل دا تسبب في كوارث كتير، غير إنه تسبب في فراغ مهول لناس كتير جدًا، معناه إنك بتقضي حياتك أصلًا على البرامج دي! فهل فعلًا همَ سيطروا علينا، وهل السيطرة دي لها فائدة لينا ولا ضررها كبير! وهل ممكن نعيش في عالم من غير أي برامج تواصل، ولا خلاص، البشر بقوا مدمنين البرامج دي والتليفون بقى جزء لا يتجزأ من الإنسان؟! لازم تفكروا، ولازم فعلًا تستوعبوا حجم الكارثة اللي بقينا فيها، ولازم تفهموا إن عالم كامل بقى مدمن، والعالم عارف إنه مدمن، ومكمل. طبعًا فيسبوك وماسنجر وإنستجرام اشتغلوا، بس واتساب لسه متعطل، وأكيد هيشتغل خلال مدة قليلة. وبالمناسبة ناس كتير هتلاقيها مش عارفة تعمل كومنت أو لايك أو شير ودا لأن العطل في فيسبوك لسه متصلحش بشكل كامل. - طبعًا مهم جدًا تشير البوست وتتفاعل معاه علشان يوصل لغيرك http://dlvr.it/S8x36h http://dlvr.it/S8xWqk http://dlvr.it/S8y3Wg http://dlvr.it/S8yg6P
http://dlvr.it/S90nMJ
تعليقات



حجم الخط
+
16
-
تباعد السطور
+
2
-