Recientemente director di AZV, señor Ruben Goedhoop y e presidente di e Hunta di Directiva di VGZ, señor Tom Kliphuis tabata di bishita cerca Minister di Turismo, Salubridad Publico y Deporte, Dangui Oduber. Durante e mainta ameno aki, señor Tom Kliphuis kende ta presidente di e Hunta di Directiva di VGZ, e segundo seguro medico mas grandi di Hulanda y cu ta provee servicio na 4 miyon asegurado a elabora riba diferente topico.
Topiconan discuti Algun di e topiconan aki tabata e situacion di cuido medico na Hulanda, con nan a introduci cuido medico mas eficiente y na ki forma a busca colaboracion cu tur e dunadonan di cuido. Remarcabel tabata cu aunke VGZ ta mucho mas grandi cu AZV y cu e situacion di Hulanda ta diferente, asina mes tabata tin hopi puntonan parecido na Aruba. Por ehempel e situacion di tempo di espera cerca dunadonan di cuido, e pregunta kico ta cuido medico necesario compara cu cuido medico innecesario y na ki momento tin mester di haci cambio den cuido medico.
Punto di bista di AZV Pa director di AZV, señor Ruben Goedhoop e bishita cerca Minister Dangui Oduber tabata un oportunidad pa intercambia di idea y pa informa Minister cu AZV ta firma un contracto di colaboracion cu VGZ. E contracto di colaboracion aki lo nifica pasonan nobo pa futuro di Aruba ya cu entre partidonan lo tin continuamente intercambio di experiencia y conocimento.
Gradicimento Minister Dangui Oduber ta finalisa e mainta gradiciendo señores Ruben Goedhoop y Tim Kliphuis pa nan bishita. E ta desea ambos partido hopi exito y ta sigura nan cu por conta riba e colaboracion di su Ministerio tambe.