E preparacionnan ta den full swing pa un ceremonia digno pa Padul del Caribe, tata di nos cultura y co-autor di e himno di Aruba, kende a fayece siman pasa, 28 di november.
Fundacion Padu, presidi pa Alice van Romond, ta trahando riba e ceremonia cu lo tuma luga diahuebs awor. Fundacion Padu a uni su mes na Gobierno, y famia, pa haci e preparacionnan necesario di loke nan kier tin como e miho despedida pa un persona cu a nifica hopi pa Aruba.
E despedida nacional ta tuma luga diahuebs awo riba Plasa Padu. E ceremonia lo cuminsa pa 6.30 y lo dura te 10.30 di anochi. Henter pueblo tin oportunidad e anochi aki pa tuma despedida di Padu. E anochi lo ta presente, directamente for di Corsou, Norman Moron y Ced Ride. Un cantidad grandi di musico lo ta presente e anochi aki. Gobierno tambe lo tin su representacion e anochi aki. E parti di coordinacion di musica ta den man di Robert Maduro.
E programa completo no ta cla ainda, ya cu awe durante dia e Fundacion, Gobierno y famia di Padu ta sinta y pone e ultimo detayenan.
Diabierna e curpa di Padu lo ta den Kerki Protestant y despues pa santana Protestant den Caya Ernesto Petronia.