Un team di boluntario cu ta forma parti di Stichting Parkietenbos a topa cu Serlimar na Ser’i Teishi ayera mainta pa 9:30. Esaki tabata un reunion solicita ya pa algun siman caba di parti di e fundacion di e barionan pa motibo cu ademas di huma y holor malo di e dump di Parkietenbos, holor malo di Ser’i Teishi tambe a cuminsa afecta e barionan concerni. E team di habitantenan tabata di e barionan: Mahuma, Parkietenbos, Simeon Antonio, Buena Vista y Bucutiweg. Nan a reclama energicamente na Serlimar e holor malo cu ta biniendo di e area di Ser’i Teishi y kier a haya un splicacion pasobra cu e solucion temporal aki ta birando un di dos molester y peliger pa salud di e famianan di e barionan den sercania.
Director di Serlimar Sr. Henly Davelaar y demas personal di Serlimar presente a duna un splicacion amplio di e situacion na e habitantenan di e barionan di kiko ta nan plan y strategia di trabao pa remedia e situacion. Nan a informa cu den algun dia nan lo haya extra material di Inglatera pa pone riba e area caminda cu holor ta saliendo. E miembronan a recorda e director di Serlimar di cuanto molester ya nan ta hayando di e Dump na Parkietenbos. Tur aña for di lunanan di juli-augustus ora cu biento cuminsa cambia di direccion te cu luna di november nan tin cu soporta e molester di gas y huma toxico di e dump. Pues nan ta spera cu Ser’i Teishi rapidamente por ser controla pa e no bira un di dos molester ambiental continuo y menasa pa salud di e famianan di e barionan concerni.
Director di Serlimar a informa e habitantenan cu e problema di desperdicio ta uno compleho y grandi y cu e situacion ta hopi critico pasobra tin falta di espacio, tempo, recursonan financiero y ley na e momentonan aki pa resolve den forma duradero e problema di desperdicio. Ela enfatisa cu e problema di e dump di Parkietenbos ta un problema pa Aruba completo awor aki y cu e mester wordo sera. Stichting Parkietenbos ta spera cu miembronan di Parlamento y Gobierno comprende y carga nan responsabilidad, e situacion di e miles di habitantenan di e barionan ta un asunto critico y urgente. E huma toxico di dump cu cada bes ta drenta e barionan concerni ta causa cu varios habitante ta sufri di Chronic Obstructive Pulmonary Disease (COPD) manera entre otro astma. Nos no por warda mas tempo pa drecha e situación actual, mester remedia e situación AWOR MES!