WINDHOEK - Ministera gonodoropa ekuliko nomukunda doponze Peya Mushelenga, kayinkondopekere asi elikwamo lyokukadika mambo gomanzi ngesi kuna kuza likatameke hena, omu yina kara asi epangero kuna kugava tupu yimaliva ano omu mokutura asi kampanike nazikarugana yirugana yangoso oyo simpe melikwamo yina kara. Elikwamo eli lyokudika mambo gomanzi posiruwo simwe kwakere egano lyaPresidente gwanare Hifikepunye Pohamba omu gagazarere asi vahepa kurugana ngoso vagusepo udigu womambo, omu gasinganyekere asi ngano vatunge mambo gokusika ko 148 000 komeho vakasike komvhura 2030.
Mushelenga katanterere sayitunga zaNew Era mosikondo vike asi malikwamo gokuninka asi vavatere vantu kupitira melikwamo lyaShack dweller Federation of Namibia kapi lyahaga nampili nakauke. Nokugwedako asi elikwamo eli lya Build Together nalyo simpe kuna kulikorangenda. Ano simpe nye eyi tuna kutumbura asi (PPP) kapi lyahaga kuwapukurura evhu nay okapi yahaga nampili nakauke , Mushelenga yimo ngoso ana kutanta. Age katente asi ministeli zendi kazigwene mbapira ezi vana kutumbura asi blueprint ntani ezi nye zina kugava egano mo lyokutura elikwamo mosirugana. Age katente asi kehagero lyaPembagona mvhura zeezi, kuna kara ko mambo gokusika ko 92 vamana gana kara asi simpe kwato venyago morwa elikwamo lyokugwana mukuli. Mokusikisamo nye mambo ogo, mbanga nomavango gokugava mukuli epangero kupitira moNHE, ngesi kuna kugava makongo kovantu ava vana kugwananenamo mauwa. Apa nye kavamupulire asi yimaliwa yingapi lina ruganesa epangero mokuwapukurura mambo aga vazonagura, Mushelenga katente asi kapi ana kara nosivaruro nye age katente asi simpe kuna kundindira vamupe asi yingapi varuganesa konokampani dakunga evango ntani asi yimaliwa yingapi vazumbanesa mokuwapukurura nonzugo edi vazonagura.
NHE age katente asi sirugana esi savatumbukira awo kurandesa tupu mambo aga gana kara asi gana pu kudika ntani varandi vanavagwana. Mokukwama muhuyungilipo gwaNHE, Eri Limbongani,NHE katente asi NHE kapi ana lituramo mokudika mambo aga hawe. Awo kwakara tupu asi wokugava sirugana konokampani dadiva kutunga mambo. Anon ye eyi yokuninka asi vatare asi kampani ke nazikatunga, nokutara asi ngapi vana kugatunga nokugava epulisiro hawe oyo vanayitugusa, kuna kara ngesi asi situmbukira soministeli zonodoropa nekuliko nomukunda dokomambo, yimo ngoso ana kutanta.