Tema: Shuhet ylli i skenës shqiptare Bujar Lako

Pëson atak ardiak, ndahet nga jeta aktori i madh shqiptar Bujar Lako. Rolet e paharrueshme që luajti





Aktori i njohur shqiptar Bujar Lako është ndarë nga jeta në moshën 68-vjeçare, si pasojë e një ataku në zemër. Ngjarja ndodhi mëngjesin e sotëm rreth orës 8:30.

Bujar Lako, aktori i mirënjohur shqiptar lindi në Tiranë më vitin 1948.



Karrierën si aktor ai e filloi në Teatrin Kombëtar pas mbarimit të studimeve në Institutin e Lartë të Arteve në Tiranë, më 1973. Shumë shpejt u bë i njohur nëpërmjet filmave “Në fillim të verës” i G. Erebarës dhe “Përballimi” i V. Gjikës. Pas kësaj ai realizoi një serë figurash në rreth tridhjetë filma midis të cilëve mund të përmendim: “Gjeneral gramafoni” V. Gjika, “Udha e shkronjave” V. Prifti, “Ballë per ballë” K. Çashku, P. Milkani, “Kthimi i ushtrisë se vdekur” dhe “Gurët e shtëpisë sime” Dh. Anagnosti, “Amiko” Cizia Zyke, produksion francez.

Në teatër ka interpretuar rreth shtatëdhjetë role, midis të cilëve veçojmë: “Vizita e inspektorit” Xh. Pristli, (Dh. Pecani), `Monserati” E. Robles (P. Mani), “Vdekja e një komisioneri” A. Miler (F. Haxhiraj), “Vdekja e Dantonit” Byhner (V. Milçin), “Ditë vere” Mrozhek, (B. Lako), “Ariu” Çehov (S. Duni) etj. Në vitin 1992 interepreton në Teatrin e Kombësive ne Shkup në produksionin “Varrtarët” .

Në vitin 1975 është nderuar me çmimin e veçantë per filmin “Përballimi”. Në vitin 1979 çmimin e veçantë për filmin “Ballë për ballë”. Në festivalin e filmit të vitit 1979 vlerësohet si aktori me i mirë i festivalit dhe nderohet me kupën e festivalit për rolin e Halit i Beratit në filmin “Gjeneral gramafoni“. Në vitin 1979 është lauruar me çmimin e Republikës së shkallës se parë, për filmat “Gjeneral gramafoni” dhe “Ballë për ballë”. Në vitin 1982 është nderuar me urdhrin “Naim Frashëri” klasi i parë, për interpretim në teatër. Në festivalin e filmit të vitit 1991 është shpallur aktori me i mirë për interpretimin e rolit të gjeneralit në filmin “Kthimi i ushtrisë se vdekur“.

Në vitin 1985 fitoi titullin “Artist i Merituar” Në vitin 2005 ka marrë “Palmën e artë” si aktori më i mirë i Festivalit në edicionin e 29 “Cairo International Film Festival” me filmin “Megic Eye” të regjisorit Kujtim Çashku. Ky është çmimi më i madh i marrë nga një aktor Shqiptar në një festival të kategorisë A.

Në vitin 2013 iu dha titulli “Nder i Kombit” nga Presidenti i republikës.

Balkanweb

Parandjenjat e Lakos: I madh nëse jeton edhe pasi ke vdekur

TIRANE-Pak ditë para se të vdiste, aktori Bujar Lako ka shkruar mbi jetën dhe vdekjen. Bie në sy një postim ime thenien e aktorit James Dean që Lako e ka publikuar më 2 Dhjetor.

"Unë mendoj se ka vetëm një formë te madhështisë për njeriun. Në qoftë se një njeri mund të ngushtoje hendekun mes jetës dhe vdekjes. Kjo do të thotë, se ai mund të jetojë edhe pasi ai ka vdekur, atëherë ndoshta ai do te ishte një njeri i madh. Për mua i vetmi sukses, e vetmja madhështi, është pavdekësia "*" James Dean ........ 2016 #bujarlako

Pak para këtij postimi, ai ka sjellë sekuencë nga filmit, ‘Kthimi i Ushtrisë së Vdekur’. Spikat pjesa ku një kafkë nxirret nga varri dhe më pas zëvëndësohet nga fytyra e Gjeneralit, roli që luhet Bujar Lako.

Nuk dimë përjetimet e aktorit ditët e fundit se përse ka zgjedhur këto pjesë, nëse ka pasur parandjenja për vdekjen ose jo. Por pak ditë pas frazës dhe videos, zemra e Bujar e Lako pushoi së rrahuri ditën e hënë, 26 Dhjetor.

Aktori i mirënjohur është përcjellë dje për në banesën e fundit në Sharrë.

Homazhet disa minutëshe u mbajtën në shtëpinë e tij pranë rrugës “Myslym Shyri” ashtu siç kishte lënë amanetin dhe aktori.

Ai nuk kish dashur të përcillej nga teatri po nga shtëpia ku u nda nga jeta, të hënën në orën 8:30 të mëngjesit.

Në varrimin e tij, morën pjesë kolegë, miq e të afërm, e mes të tjerësh edhe kryeministri Edi Rama.



Shqiptarja

Shuhet Bujar Lako,Mevlan Shanaj: Iku Bujo, klithmë nga qielli



TIRANE-Aktori Mevlan Shanaj ka qenë një ndër miqtë e aktorit të famshëm Bujar Lako. Kolegë në film e miq në jetën reale, Shanaj e ka hedhur me dy rreshta dhimbjen pasi mësoi ndarjen nga jeta të Bujar Lakos.

“Klithme nga qielli nga shpirti, gjithe ajri me merr frymen , ka ikur Bujo!! Lajm i dhimbshem theres qe ne miqte si edhe familja e kemi te pa perballueshem”, shkruan Shanaj ndërsa publikon dhe një foto me mikun e tij.

Shanaj e Lako kanë luajtur sëbashku shumë role, por më i famshmi ka qenë filmi ‘Ballë për ballë”.

Shqiptarja

Ndarja nga jeta e Bujar Lakos Rama: Trishtim, si e njoha/VD

Kryeministri Edi Rama ka ngushëlluar ndarjen nga jeta të aktorit Bujar Lako.

Përmes një statusi në Facebook, kreu i qeverisë e quan trishtues ndarjen nga jeta, ndërsa tregon dhe si e ka njohur aktorin e madh të skenës shqiptare.

Rama ka postuar edhe një video me sekuencë nga filmi “Gjeneral Gramafoni”, ku Lako luan një rol protagonisti.

“Kam qenë sa ky fëmija këtu kur e njoha Bujon... E s'kam si ta besoj dot se nuk do t'i çoj dot më shishen e verës për ditëlindje e s'do ta marr më mesazhin e tij për Vitin e Ri... ÇFARË TRISHTIMI!”, shkruan Rama.

Shqiptarja

Shfaqja e fundit, Laert Vasili rrëfen pengun e Bujar Lakos



TIRANË-Shfaqja e fundit e Bujar Lakos ka qenë në veprën e Ismail Kadare të vënë në skenë nga Laert Vasili, “Kush e solli Doruntinën”. Lako luante rolin e kryepeshkopit krah aktores së njohur Margarita Xhepa.

Regjisori dhe aktori Laert Vasili rrëfeu në një lidhje telefonike në Report TV pengun e fundit të aktorit Bujar Lako, i cili u nda nga jeta mengjesin e sotëm.

Sipas Vasilit, Lakos i mbeti peng roli i Ali Pashe Tepelenës, për të cilin po bisedonte për ta vënë në jetë. Regjisori e cilësoi Bujar Lakon si patriarkun e skenës dhe ekranit shqiptar.

Zoti Vasili Përshëndetje. Ju keni bashkëpunuar pak muaj më parë me Lakon për pejsën ‘Kush e solli Doruntinën’. Pse e zgjodhët Bujar Lakon për rolin e kryepeshkopit.

Ndarja nga jeta e mjeshtrit Bujar Lako është një dhimbje e madhe për skenën e teatrit, kinematografinë shqiptare, miqtë e tij, e shqiptarëve që kanë parë filmat e tij. Kjo është arsyeja që zgjodha Bujar Lakon për rolin e kryepeshkopiut tek ‘Doruntina’, pasi ai ishte patriarku i skenës shqiptare. Ai vazhdon të jetë patriarku i skenës së aktrimit shqiptar.

Pengu që Bujar Lako pati, që nuk e realizoi dot…

Një rol që Bujos i mbeti peng ishte roli i Ali Pashë Tepelena. Kemi qenë duke biseduar kohët e fundit për ta vënë në jetë këtë rol. Pengu i madh, është që Bujo u nis për t’u prehur mes engjejve, ne na la pengun më të madh, sepse nuk është mes nesh. Pengu i madh është i joni sepse ai iku i plotë, por boshllëku që na la ne, është dhimbje e madhe, shumë e madhe.




Ne rolin e kryepeshkopit tek pjesa, 'Kush e solli Doruntinen')


Bujar Lako


Laert Vasili

Shqiptarja

Bulku: Peng i Lakos, që lindëm në vend të varfër e komunist



TIRANE-Aktorja Rajmonda Bulku mes lotësh shprehet se Shqipëria humbi një aktor të rrallë. “Nuk ka më Bujar Lako, nuk ka më aktor si ai. Do i mungojë teatrit, filmit, neve na mungon, artit shqiptar i mungon, ne do vuajmë për këtë mungesë”, thotë Bulku në një telefonatë për Report Tv.

E pyetur nëse kishte ndonjë peng, Rajmonda Bulku shprehet se shpesh me Bujarin bënin shaka duke hamendësuar sesa të famshëm do të ishin bërë nëse do të kishin lindur në një vend perëndimor.

“Nuk e di nëse mund të quhet peng, por shpesh bënim shaka e qeshnim kur thoshim, ‘Na ra koka në një vend të varfër dhe komunist, ndryshe do ishte diku tjetër’. Shokohesh kur mëson këtë humbje. E duam Bujarin tonë ne aktorët, e duam të gjithë shqiptarët kudo ku janë”.

Bulku madje shpreh habi sesi zemra u bë shkak për vdekjen e Bujar Lakos.

“Bujari ishte ndër ata meshkuj, që as bark nuk vuri kurrë, e kishim zili për fizikun e tij dhe na habiti ky atak kardiak”.

Shqiptarja

“Tunxh bir!” Aktori Çun Lajçi poezi për Bujar Lakon



Aktori i njohur nga Kosova Çun Lajçi i ka kushtuar një poezi, ndarjes së parakohshme nga jeta të artistit dhe mikut të tij Bujar Lako. Një poezi që flet për dhembjen dhe mungesën që do të sjellë kjo humbje jo vetëm miqësisë së tyre, por edhe artit shqiptar. Çun Lajçi është një personazh i njohur i teatrit dhe kinematografisë shqiptare. Një tjetër pasion i tij është dhe poezia. Shpesh ai ka zgjedhur këtë formë për të bërë homazhe ndaj figurave të njohura si ish presidenti i ndjerë i Kosovës Ibrahim Rugova. Por, poezinë ai e sheh edhe si një formë të revoltës ndaj problemeve aktuale në botën shqiptare. Poezia kushtuar aktorit Bujar Lako, titullohet “Tunxh bir“. Frymëzuar nga filmi “Udha e shkronjave” prodhim i vitit 1978, sipas skenarit të Dhimitër Shuteriqit, ky rol është një tjetër arritje në karrierën e Lakos.

Poezia:

Tunxh bir

(Bujar Lakos)
Mjfatonte ta dija se n’ rrugën Myslim Shuri
Merrje frymë
Ti fjala ime tjetër e “moshës së bardhë”

Mjaftonte t’i kujtoja ditët e largëta
Të një ëndërre t’acart
Për Gjeneralin që eshtra mblidhte
Në natën pis të zezë
Për t’bërë gjumë qingji unë k’tej atdheut

Shallvaret frymonin me mustakun tënd
E artin e shkronjave
Që udhë bënë e gjurmë lan Shqipërisë



Unë sa herë hapa krahun zog u bëra mbi ‘Bllokun’
N’cicërimë veç sa s’thashë:
Lako, thuaj Timos e Rikardit, k’tu m’keni
Erdha t’marr pak art nga shikimi yt i thellë
E t’bëhëm
“gramafon” e gisht n’vrimë klarineti

Lum unë që fjalën për Ty shumëherë e thashë
Hej, Tunxhin vetun pse ma leni.

Shqip