Artista Ezkimo, nappo Mikko Mutenia lea vádjolan mihcamáraid áigge. Mutenia lei eret Avvilis ja su báhce moraštit eará guovllu rap-artisttat.
Okta, guhte dovddai Ezkimo, lei anáraš rap-artista Amoc. Son oahpásnuvai Ezkimoi musihkakarrieras álgojagiin Avvilis.
– Mis lei Guerra Norte -nammasaš rap-kollektiiva, mas son lei maid mielde. Dál lea jahkebeali siste jo nubbi guhte lea jápmán avvillaš rappariin, muitala Amoc.
Amoc čujuha dasa, go Davvi-Suoma rapparbiras šattai dahkat maŋemus dearvvuođaid gieskat maiddái nuppi avvillaš rapmusihkkarii Erik ”Edorf” Ingebrigtseniin.
Ezkimo dagai suopmelaš rap-musihka stuorra namaiguin
Amoc lei bargan ovttas Ezkimoin rap-kollektiivva bokte, muhto Ezkimo lei maid mielde Amoc Nortenos legioon -nammasaš bihtás.
Goittotge Amoc muitala, ahte ii lean ovttasbarggus Ezkimoin dál maŋemuš jagiin.
– Ain duollet dálle goittotge deiven su Helssegis, dallego iešge ássen doppe, muittaša Amoc.
Seremoniamestari, Fintelligens ja Ezkimo rahpe suomagielat rapmáilmmi 2000-logus álbmoga dihtosii ja Ezkimo šattaige álbmumis bokte jođánit bivnnut Suomas.
Gažaldahkii manin avvillaččat, nu mo Ezkimo, besse guhkás rap-musihkain guhkás Suomas, ii máhte Amoc vástidit.
– In gal dieđe, mo son šattai nu jođánit dovddus. In jearran dan sus goassige, dat lei oalle lunddolaš.
"Attii jáhku bargat dakkár musihkain"
Amoc lei čuvvon álggu rájes Ezkimo, nappo Mikko Mutenia musihkarbarggu.
Amoc jáhkká, ahte Ezkimos lei eambbo váikkuhus su jurddašanvuohkái, go musihkalaš beallái.
– Mun lean dovdan Mikko dan rájes go iešge álgen bargat rap-musihkain. Dieđusge buot Avvil rapparat bohte oktii dalle. In dieđe leago musihkas miige njuolga váikkuhus boahtán Ezkimo bokte mu musihkkii. Muhto son attii dakkár jáhku dasa, ahte sáhttá ráhkadit dakkár musihka maid hálida ja birge dainna, árvala Amoc.
Maŋimus jagiid áigge Mutenia dáiddárnamma lei Agentti SUMO, ja son lei válmmaštallame njealját studioalbuma.
Amoc maid lei geargan muhtun daid ođđa bihtáid guldalit.
– Lean guldalan su ođđa bihtáid interneahtas ja su viellja dajai, ahte lea várren Ezkimoi duogášmusihkaid. Muhto in dieđe man ollu gárvvis materiála doppe lea, nu ahte albuma sáhtášii almmustahttit postumlaččat, láhttesta vel Amoc loahpas.